من على منتدى فتكات التدبير المنزلى اسهل طريقة لصناعة معطرات الجو والملابس والسجاد وباقل التكاليف صناعة يدوية من غير مخاطر كيماوية ولاغيرة وطريقة سهلة جدا مش محتاجة مجهود كبير تخلص فى 3 دقايق على السريع كده كل اللى محتاجينه زجاجة اسبراى (بخاخة)زيت عطرى او فانيليا سايلة او روح اللى تحبوه يعنى ورد او نعناع كده يعنى
شوية سبرتو (كحول و دا مش لازم قوى عشان ما نحبكهاش )
5 نقط جليسرين ( و دا من مثبتات البرفانات التركيب اللى سهل الحصول عليه)
ماء مقطر من الصيدليه او ماء سبق غليه وتبريده حسب حجم البخاخة
نعمل ايه بقى: نحط الميه فى البخاخة نص حجمها
و نحط ما يعادل ملعقتين كحول طبى من الصيدليه
و نحط الجلسرين و الزيت اللى عاوزينه او الريحه اللى تحبيها بردو ما يعادل ملعقتين
او ربع البخاخة بتاعتنا
ونرج جامد و بس خلص خلاص
كل المطلوب من حضرتك تحطيه فى التلاجة او الفريزر يوم او يومين و بعدها يا تستخدميه يا اما تحطيه فى مكان ضلمة يومين كده و بجد شمى احلى سبراى
انا برشه على السجاد و الستاير بعد التنضيف ريحته بتملى الشقة بجد و خفيف و مش مضر زى السبراى الموجود فى السوق بالعكس و اهو مالوش دعوة بالاوزون ولا التلوث البيئى و تقدرى ترشيه لو عندك اطفال و ريحته خفيفة اوى يعنى اللى داخل المكان يلاحظها اصلى مش بحب الروايح الظاهرة اوى بحسها اوووفر
انتى ممكن تزودى الزيت حسب زوقك و نوع العطر اللى انتى اخترتيه
يعنى اللى انا بستخدمه دلوقت عملته بفانيليا سايلة ربع وقيه و نص بخاخاة ميه سبق غليها و ربع كحول و 5 نقط جليسرين و حطيتهم فى بخاخة الكحول الاسبراى من الصيدليه و بجد تحسى انك فى مخبز من ريحة الفانيليا الرهيبة
