نافذة مصر العيش البلدى نافذة مصر مغامرات دورا نافذة مصر

قصة من الواقع نافذة مصر العيش البلدى نافذة مصر مغامرات دورا نافذة مصر مغامرات الشرق عن واحدة راحت تجيب عيش شافت فى سكتها اللى شافتة وطبعا هي مغامرة لاني ماشترتش عيش ابدا الا بعد ماتجوزت .. في الاول كنت فرحانة اوي اني اجرب الاحساس ده وقد كان ..

(ع الهامش: انا بس نزلت اجيب العيش كعقاب من زوجي ولاني نظرا لذاكرتي القوية كل مرة انسى اني اقوله يشتري العيش ومش افتكر الا وقت الاكل زي مثلا يكون صايم وجايين من مشوار ع الاكل علطول وجايبين فول وطعمية وهوب ملاقيش ولا لقمة في البيت.. غلبانة والله)

المهم اول مرة نزلت اجيب العيش جوزي وصفلي الطريق كويس وحتى وصفلي الكشك كمان انه مكعب وعليه بوسترات واكيد بيكون قدامه ناس ..

وبغض النظر اني اتلخبطت في الشوارع ورحت كشك عيش تاني بعيد جدا بعد ماسالت امة لا اله الا الله على الطريق ..

رحت واول ماوصلت الشارع لاقيت كشك وعليه بوسترات كتير بس ملقتش حد قدامه خالص الا واحد بس فزعلت اوي اني اتاخرت وسالته:
هما قفلو خلاص؟!!
قاللي: قصدك على مين يابنتي ؟!!
قلتله: هو ده مش كشك العيش؟!!!!!!
قاللي: لا ده كشك الكهربا..
انا:  (طبعا لا تعليق هاقول ايه)
واعتذرتله ومشيت

وفعلا لاقيت كشك العيش في نفس الشارع بس قدام شوية ..
وطبعا كانت اول مرة اشوف طوابير العيش اللي باسمع عنها ..
وكانت اكبر مشكلة معايا وزي ماقلتلكم فوق ذاكرتي الفولاذية
فاول ما وقفت في الطابور راحت اللي قدامي قايلالي: انا اللي قدامك وهاروح مشوار وراجعة تاني افتكريني ..
انا: يالاهوي افتكر مين (طبعا في سري)..
ولسة ولاقيت اللي ورايا برضه واللي قدام اللي قدامي ..
بس الحمد لله طلع انهم متعودين على كده وزي ماتقولو كل واحدة كانت حافظة اللي قدامها ووراها
(الا انا طبعا)
والحمد لله جبت العيش ومشيت ..

تاني مرة بقى لسة الاتنين اللي فات وابني دلوقتي عنده سنتين ونص ..
وكالعادة جوزي قاللي ابقي عرفيني قبل العيش مايخلص بفترة وانا وقت الذروة افوجا انه مفيش عيش ..

المهم قاللي انزلي انتي هاتيه بقى ..

ورحت بس اتعلمت من المرة الاولي وعرفت الكشك اللي جنبنا ..

واخدت ابني معايا وواحنا ماشيين (هو بيحب قناة طيور الجنة ومغرم باغنية عمو حرامي)
واحنا ماشيين شاف صورة بوستر لعبد المنعم ابو الفتوح وبعلو صوته : ماما عمو حرامي اهه؟!!

انا: بس حبيبي وطي صوتك

وشوية وشاف واحد زبال
ماما ايه ده
ده عمو بينضف الشارع عشان يبقى شكله حلو
عمو حرامي

ياواد اسكت بقى

وشوية وشاف معزة قاعدة بتاكل
ماما ايه ده
دي معزة
عايز اسوفها (اشوفها يعني)
(انا بترعب من الحاجات دي اصلا) مش وقته حبيبي

والحمد لله رحنا وجيبنا العيش وبغض النظر اني كنت واقفة مكان الرجال مع انه مكتوب بخط طويل عريض على الحيطة
حريم .............. رجال
بس تداركت الموقف ووقفت مع الستات وطبعا ابني حبيبي يشاور على اي واحدة
ايه ده ياماما (تقولوش من كوكب تاني)
دي خالتو حبيبي

وواحنا راجعين بقى شاف كلب نايم يسيبه فحاله طبعا لا .. بعلو صوته
هو هو
راح الكلب صاحي وباصصلنا بترقب
وانا بقى مقولكوش على حالي خصوصا لما الكلب اتقام كده ونوى يتمشى معانا
بس حبيبي الله يهديك سيبه فحاله .. اجري ياااخااالد

بس ودول كانو تجربتيني في شرى العيش ..
بغض النظر على المرة اللي رحت وكان الجو هادي خالص والرجل مكرم ادالي سبت العيش عشان اهويه قبل مااشيله في الشنطة قمت بكل فتاكة مفضياه في الكيس ومرجعاله السبت